O concello de Cambre converterase no gran observatorio de Galicia cun proxecto para seguir a eclipse de sol
Un fenómeno astronómico excepcional situará ao termo municipal de Cambre nunha posición totalmente privilexiada dentro do mapa galego. O vindeiro mércores 12 de agosto a aliñación absoluta da lúa co astro rei poderá seguirse en directo desde múltiples puntos da localidade. Para preparar este acontecemento histórico de forma didáctica e protexida, a agrupación xuvenil XentD100cia impulsou, co apoio directo da administración local, o programa de divulgación científica 'Cambre Observa 2026'.
Dentro das primeiras ferramentas que xa se atopan operativas salienta o denominado Mapa Colaborativo de Observación. Trátase dun plano interactivo ao que se pode acceder online e que detalla os mellores enclaves do concello en base á súa accesibilidade, seguridade e calidade do ceo. A guía destaca tres Puntos Estrela que son Anceis, o local social de Bribes e o paseo do Temple, aínda que tamén inclúe espazos idóneos como as igrexas de Sigrás e Altamira, o paseo do río Mero, o campo da festa de Andeiro ou o colexio de Brexo-Lema.
O plan tamén pon o foco na mocidade co obradoiro gratuíto 'Embaixadores da Eclipse'. Esta actividade formativa está pensada para mozos de entre 12 e 18 anos que queiran constituír unha rede de divulgadores veciñais. Os interesados teñen dúas sesións dispoñibles que se impartirán en horario matinal, de 10.30 a 13.00 horas: a primeira celebrarase o luns 20 de xullo na Casa Arrigada e a segunda o martes 21 de xullo na Casa Palmeiras, no Temple. As solicitudes pódense tramitar tamén a través da web coa colaboración da OMIX cambresa.
A proposta complétase cunha terceira liña de traballo chamada 'Vivimos a Eclipse', unha campaña de ciencia cidadá na que os propios veciños recollerán datos ambientais e rexistros sobre as reaccións da biodiversidade local ante o repentino oscurecemento. O proceso comezará ás 19.31 horas e terá o seu momento culminante de escuridade total entre as 20.27 e as 20.29 horas, rematando ás 21.22 horas. A organización insiste na obrigación de utilizar lentes homologadas ou sistemas indirectos para gozar da xornada sen correr riscos visuais.