O Concello de A Coruña iniciará o martes, 20 de agosto, os traballos de reordenación viaria na rúa Sebastián Martínez Risco, no barrio de Matogrande. A intervención, aprobada polo Servizo municipal de Mobilidade, transformará a circulación no sector leste desta rúa, que pasará a ter un único sentido de circulación, dende o acceso da AC-10 ata a intersección con Luis Quintas Goyanes.
Esta reconfiguración ten como obxectivo principal mellorar a fluidez do tráfico e a seguridade peonil, especialmente nas proximidades do colexio Liceo La Paz, onde se concentran importantes fluxos de vehículos en horas de entrada e saída escolar. Ademais, esta medida permitirá incrementar máis do dobre os espazos de estacionamento dispoñibles, pasando de 30 a 60 prazas na recta principal de Sebastián Martínez Risco, grazas á nova disposición en batería.
A concelleira de Infraestruturas e Mobilidade, Noemí Díaz, destacou a importancia desta actuación, que se suma á recente creación dun aparcadoiro na contorna da mesma rúa, ampliando en 30 prazas a capacidade de estacionamento en Matogrande. Estas medidas buscan tamén previr o estacionamento indebido que se vén producindo en certas franxas horarias nas inmediacións do colexio.
O luns, 19 de agosto, instalaranse as sinalizacións verticais correspondentes para informar da prohibición de aparcar no sector leste de Sebastián Martínez Risco mentres duren os traballos de pintado da calzada. O novo sentido único facilitará a circulación dos autobuses escolares, garantindo unha conexión directa entre os accesos do colexio e a rúa.
Esta actuación é unha resposta ás solicitudes dos veciños e veciñas de Matogrande, que demandaban solucións para a conxestión viaria na zona. O Concello continúa así co seu compromiso de mellorar a mobilidade e os servizos no barrio, atendendo ás necesidades reais da cidadanía.
