O Concello da Coruña doa a entidades sociais obxectos e diñeiro non reclamados da Oficina de Obxectos Perdidos
O Concello da Coruña súmase un ano máis a unha iniciativa solidaria xestionada a través da Policía Local para dar unha segunda utilidade aos obxectos extraviados que non son reclamados. Tal e como explicou a concelleira de Seguridade Cidadá e Interior, Montse Paz, os bens que permanecen dous anos sen que os seus propietarios os recollan pasan a destinarse a fins sociais mediante a súa entrega a entidades colaboradoras.
Nesta edición, os materiais e fondos serán doados a Cáritas e á asociación Fitas do Vento, que destina os recursos a proxectos educativos e de apoio á infancia en Mozambique. Entre os elementos cedidos figura diñeiro en metálico en moeda estranxeira (335 dólares estadounidenses e 470 francos suízos), cun valor equivalente a 788 euros, que se empregarán para financiar dúas bolsas de estudo.
A doazón complétase cun inventario amplo de efectos recollidos no servizo municipal: arredor de 500 paraugas, 2.300 pezas de roupa, tres cadeiras de paseo de bebé, varias caixas con xoguetes e material escolar, 450 pares de gafas, dous cascos, 15 caixas con roupa de diferentes idades, seis instrumentos musicais, cinco patinetes, dúas bicicletas e catro maletas, entre outros útiles.
No acto de formalización da cesión participaron a concelleira Montse Paz, axentes da Policía Local e representantes das entidades beneficiarias. Desde o Concello salientan que esta medida permite apoiar a colectivos que o precisan e, ao tempo, evitar que materiais con utilidade queden almacenados sen uso ou acaben convertidos en residuos.