O Concello da Coruña acolle un xuízo simulado con escolares do CEIP Ramón de la Sagra dentro dos actos previos ao DATAfórum
O Salón de Plenos do Concello da Coruña acolleu onte, 14 de outubro, un Tribunal de Convivencia protagonizado por nenos e nenas de 6º de primaria do CEIP Ramón de la Sagra. Trátase da segunda vista xudicial simulada incluída na programación previa ao DATAfórum, despois de que o 1 de outubro tivese lugar a primeira, na Audiencia Provincial, co alumnado do IES Eusebio da Guarda. O congreso DATAfórum celebrarase na Coruña entre o 21 e o 23 de outubro.
No acto estiveron presentes o concelleiro de Educación, Formación e Innovación Tecnolóxica, Juan Ignacio Borrego; persoal docente do centro escolar; a coordinadora do máster de avogacía da UDC, María Digna Braña, acompañada de varias alumnas universitarias; a xerente territorial de Justicia de Galicia, Marta García Sande, en representación do Ministerio de Presidencia, Justicia y Relaciones con las Cortes; a xuíza María Jesús García García; a fiscal María Nemiña Suárez; e persoal do servizo de Educación do Concello.
A actividade reproduciu un caso ficticio de acoso ocorrido nun colexio inventado, cos propios menores narrando os feitos durante a vista. Borrego explicou que a iniciativa busca que, a través deste exercicio, que rematará cun debate entre os nenos e nenas asistentes, as institucións implicadas poidan sensibilizar ao alumnado e a toda a comunidade educativa sobre as consecuencias do acoso e o ciberacoso. O edil sinalou que se trata dun problema que, segundo indicou, "ocorre con frecuencia nos colexios e que non debemos silenciar", insistindo na necesidade de que todas as partes traballen de forma conxunta para combatelo dende a súa raíz.
Quinta edición do DATAfórum
Esta actividade forma parte dos actos de quecemento previos ao DATAfórum, considerado o evento de referencia en España sobre a transformación dixital da Xustiza. A súa quinta edición terá lugar na Coruña do 21 ao 23 de outubro e reunirá a uns 180 expertos en dixitalización e Xustiza, ademais de superar o milleiro de asistentes, maioritariamente profesionais do ámbito xurídico.
O congreso poñerá o foco en asuntos de actualidade para o presente e o futuro da Xustiza, entre eles a aplicación responsable da intelixencia artificial e doutras tecnoloxías orientadas a axilizar este servizo público. Entre os relatores confirmados figuran a alcaldesa da Coruña, Inés Rey, e o ministro de Presidencia, Justicia y Relaciones con las Cortes, Félix Bolaños, xunto a outras voces destacadas como José Ignacio Latorre, especialista de recoñecido prestixio internacional en intelixencia artificial; a directora xeral de Intelixencia Artificial do Goberno de España, Aleida Alcaide; e o catedrático en Dereito Procesual Jordi Nieva. Tamén está prevista a participación de conselleiros de Xustiza do Principado de Asturias, Navarra, País Vasco, Galicia e Canarias.
O programa abordará o impacto da intelixencia artificial na Xustiza dende distintos ángulos: a súa contribución a axilizar o servizo, os seus efectos no traballo de xuíces e avogados, os posibles riscos para as garantías xudiciais e o papel que debe xogar o Estado no seu control e regulación.
Ademais, o congreso incluirá sesións dedicadas a outros retos da Xustiza actual, como os delitos de odio, a desinformación, a protección de datos persoais ou o consentimento sexual na era dixital. Na última xornada, tres figuras do ámbito cultural reflexionarán sobre a transformación social e dixital dende as súas respectivas disciplinas: o guionista Carlos Montero, coñecido por series como 'Élite', falará sobre cine; a violonchelista Alejandra Díaz abordará a música; e a humorista Carolina Iglesias, coñecida nas redes sociais como @percebesygrelos, porá o acento no humor.