O Concello adxudica por 280.000 euros a humanización da rúa Páramo na Agra do Orzán
O Concello da Coruña deu un novo paso no desenvolvemento do Plan de barrios 2025-2027 coa adxudicación das obras de humanización da rúa Páramo, unha actuación que contará cun investimento de 280.000 euros e que se enmarca na primeira fase das intervencións previstas para a Agra do Orzán.
Os traballos, que se desenvolverán no tramo norte da vía ata a intersección coa rúa Canceliña, serán executados por Citanias, empresa encargada de levar a cabo a reurbanización integral da zona co obxectivo de mellorar a accesibilidade e adaptar o espazo urbano ás necesidades da veciñanza nun dos barrios con maior densidade de poboación de Galicia.
Entre as actuacións previstas destaca a ampliación e renovación das áreas destinadas ao tránsito peonil, unha medida que busca reforzar a seguridade viaria e facilitar a mobilidade. O proxecto inclúe a diferenciación dos pavimentos entre as beirarrúas e a calzada para facer máis visibles os espazos reservados ao paso das persoas viandantes.
Ademais, a intervención tamén contempla a incorporación de máis arboredo para incrementar a presenza de zonas verdes na rúa, sempre nos espazos onde a existencia de servizos soterrados permita a súa instalación.
A concelleira de Infraestruturas e Mobilidade, Noemí Díaz, destacou a importancia de impulsar actuacións que permitan gañar espazo público e adaptalo ás necesidades actuais da cidadanía. Neste sentido, incidiu especialmente na necesidade de mellorar as condicións de accesibilidade e facilitar o tránsito das persoas con mobilidade reducida.
Paralelamente, o Concello continúa avanzando noutras actuacións previstas no barrio. Neste momento mantense aberto o proceso de contratación das obras para mellorar a accesibilidade na rúa Agra do Orzán, onde está prevista a humanización da intersección entre a rolda de Nelle e as rúas Meira, Bellavista e Ramón María Aller.
O Goberno municipal estima un investimento de 220.000 euros para esta segunda actuación, que seguirá unha liña de intervención semellante á prevista para a rúa Páramo.
Segundo explicou Noemí Díaz, este tipo de proxectos non só contribúen á mellora da calidade urbana, senón que tamén poden favorecer a dinamización económica do barrio ao impulsar o pequeno comercio, promover a apertura de novos negocios e recuperar locais sen actividade.