O comedor provisional do CEIP Emilio González López de Cambre segue sen solución tras 15 anos
O comedor do CEIP Emilio González López, situado na parroquia de Brexo Lema, en Cambre, volve centrar as reclamacións da comunidade educativa. A deputada socialista Silvia Longueira denunciou no pleno do Parlamento galego que arredor de 80 nenos e nenas comen a diario nun módulo provisional instalado pola Xunta en 2011 e concibido inicialmente para atender a 40 escolares.
A parlamentaria criticou que unha solución prevista como temporal se mantivese durante quince anos, a pesar de que o número de usuarios se duplicou. Ademais da falta de espazo, sinalou que o módulo carece dun illamento térmico axeitado e que o sistema de calefacción non funciona correctamente, polo que as condicións de uso empeoran durante os meses de inverno. O PSdeG considera necesario construír un comedor novo, con condicións adecuadas e conectado co edificio principal do colexio.
As demandas non se limitan a esta instalación. Segundo expuxo Longueira, o centro precisa dunha intervención máis ampla que inclúa a substitución da caldeira, a renovación das fiestras e da instalación eléctrica, a reparación dos aseos e o pintado do edificio. Tamén alertou do estado do valado exterior do patio, que presenta deterioración e, segundo advertiu, supón un risco pola proximidade dun desnivel.
A deputada asegurou que estas necesidades xa foron trasladadas á Xunta e criticou que, ata o momento, a resposta se limitase á visita de técnicos para medir unhas portas que aínda non foron substituídas. Tras a súa intervención parlamentaria, Longueira reuniuse con representantes da ANPA para abordar as demandas da comunidade escolar.
Unha reivindicación que xa chegou ao Parlamento
A situación do comedor non é nova. O PSdeG xa levou esta problemática ao Parlamento en xuño, cando denunciou que uns 80 alumnos utilizaban un módulo deseñado para 40 e reclamou unha reforma das instalacións e a construción dun comedor conectado co edificio principal. Máis recentemente, o 29 de outubro, os socialistas presentaron unha proposición non de lei na Comisión de Educación para reclamar actuacións estruturais urxentes no centro. A iniciativa non saíu adiante ao votar o PP en contra.
Naquel debate, o grupo socialista tamén advertiu de que o módulo non reunía condicións adecuadas para o seu uso durante boa parte do ano e reclamou que a Xunta establecese un calendario de actuacións e informase a dirección e á ANPA das intervencións previstas.
A Xunta defende priorizar as obras por criterios técnicos
A situación do colexio volveu aparecer no pleno do Parlamento deste mércores, no que o conselleiro de Educación, Román Rodríguez, respondeu ás preguntas da oposición sobre as deficiencias de varios centros galegos. O responsable autonómico defendeu que as actuacións deben priorizarse atendendo a criterios técnicos e cuestionou a intención política das iniciativas presentadas polos grupos da oposición.
No caso de Cambre, Rodríguez mencionou os 1,3 millóns de euros orzados para unha intervención no CEIP Wenceslao Fernández Flórez, pero non concretou nesa resposta un calendario nin actuacións específicas para o CEIP Emilio González López. A reclamación dunha solución para o comedor e para as demais deficiencias do centro continúa así sobre a mesa.