O Coliseum acollerá un concerto exclusivo en Galicia de Guitarricadelafuente o 24 de maio
A Coruña será a cidade galega seleccionada por Guitarricadelafuente na súa nova xira, que terá unha das súas primeiras paradas o 24 de maio no Coliseum. O concerto promete ser unha experiencia única, cun repertorio que combinará os éxitos que definiron a carreira do artista con novos temas do seu próximo álbum.
As entradas estarán dispoñibles desde o luns 2 de decembro ás 10.00 horas a través da plataforma Ataquilla e no despacho de billetes da praza de Ourense. Segundo o concelleiro de Cultura e Turismo, Gonzalo Castro, “o Goberno de Inés Rey segue apostando por converter A Coruña no epicentro cultural do noroeste, con eventos de gran relevancia todas as semanas”.
Álvaro Lafuente, coñecido artisticamente como Guitarricadelafuente, regresará aos escenarios en 2025 cunha xira que busca conectar directamente co público a través de concertos en espazos seleccionados, garantindo unha atmosfera íntima. A súa proposta artística destaca por un formato coidado e singular que reflicte a nova etapa da súa carreira, consolidándoo como un dos artistas máis prometedores do panorama musical actual.