O Colexio de Enfermaría da Coruña alerta de que Galicia continúa entre as comunidades con menos enfermeiras de España
O Colexio Oficial de Enfermaría da Coruña volveu advertir da insuficiencia de profesionais de enfermaría en Galicia, unha situación que, segundo denuncia, continúa poñendo en risco a capacidade do sistema sanitario para atender unha poboación cada vez máis envellecida e cunha elevada prevalencia de enfermidades crónicas que requiren seguimento especializado.
Segundo o último informe sobre ratios elaborado polo Consello Xeral de Enfermaría, Galicia pechou o ano 2025 cunha ratio de 5,33 enfermeiras por cada 1.000 habitantes, situándose como a segunda comunidade autónoma con menor dispoñibilidade destes profesionais en todo o Estado. A cifra queda claramente por debaixo da media española, fixada en 6,45, e tamén da europea, que alcanza as 8,12 enfermeiras por cada milleiro de habitantes.
Aínda que o conxunto do Estado experimentou unha lixeira mellora respecto ao ano anterior, o Consello Xeral de Enfermaría considera que o incremento resulta insuficiente para responder ás necesidades actuais do sistema sanitario e estima que España precisa incorporar arredor de 100.000 profesionais máis para alcanzar unha cobertura adecuada.
O presidente do Colexio Oficial de Enfermaría da Coruña, Avelino Castro Pastor, sinala que esta situación se agrava especialmente durante os meses de verán, cando as vacacións do persoal coinciden coa falta dunha planificación eficaz para cubrir as substitucións. Ademais, lembra que a elevada temporalidade continúa sendo unha das principais debilidades do sistema, indicando que durante 2025 o 76 % dos contratos realizados na sanidade española tiveron carácter temporal.
O informe tamén evidencia importantes diferenzas entre comunidades autónomas. Navarra e Euskadi encabezan a clasificación estatal con ratios superiores ás oito enfermeiras por cada 1.000 habitantes, mentres que Galicia figura entre os territorios con menor dotación, só por diante da Rexión de Murcia.
No ámbito provincial, Lugo é a única provincia galega que supera a media nacional, con 7,12 enfermeiras por cada milleiro de habitantes. Pola contra, A Coruña sitúase en 5,96, Ourense en 4,95 e Pontevedra ocupa o último lugar do ranking estatal, cunha ratio de apenas 4,08 profesionais por cada 1.000 habitantes.
Desde o Colexio de Enfermaría da Coruña consideran que estas diferenzas territoriais evidencian importantes desigualdades no acceso aos coidados sanitarios. Avelino Castro Pastor sostén que a falta de enfermeiras non só incrementa a carga asistencial que soportan os profesionais, senón que tamén repercute directamente na atención que reciben os pacientes, insistindo na necesidade de reforzar os cadros de persoal para garantir unha asistencia sanitaria de calidade e en condicións de equidade.