O Club Natación Ordes pecha o Galego Alevín con dúas pratas e unha participación histórica
O Club Natación Ordes despediu practicamente a tempada cunha destacada actuación no Campionato Galego Alevín de Verán, disputado esta fin de semana na piscina de Rías do Sur, en Pontevedra. A cita reuniu 221 deportistas de 28 clubs de toda Galicia e serviu como unha das grandes probas autonómicas de peche do curso.
A entidade ordense chegou á competición coa súa representación máis ampla neste campionato, formada por dez nadadores que conseguiron previamente as marcas mínimas necesarias para participar. O club destacou o traballo realizado durante toda a tempada polos deportistas máis novos, que volveron deixar boas sensacións na piscina.
O balance máis destacado chegou con dúas medallas de prata. Lía Amor subiu ao segundo chanzo do podio nos 200 bolboreta, mentres que Xian tamén acadou a prata nos 400 estilos, confirmando o bo momento competitivo do equipo.
Ademais dos podios, o Club Natación Ordes asinou varias mellores marcas persoais. Yoel mellorou nos 50 libre, 50 costas e 100 libre; Abel fíxoo nos 50 libre; Carla, nos 200 costas; Cosme, nos 50 libre e 50 braza; Lía, nos 50 libre, 50 braza e 200 bolboreta; e Paula, nos 50 braza.
O campionato rematou co CN Ferrol como gañador da clasificación conxunta, seguido polo CN Ponteareas e o CN Portamiñá. Para o Club Natación Ordes, a cita supón un broche positivo a unha tempada marcada pola progresión da súa base e pola presenza crecente en competicións autonómicas.