O Ciclo Mestre Mateo amplía a rede de cinema galego en vilas sen salas comerciais
O Ciclo Mestre Mateo inicia unha nova edición na provincia da Coruña co obxectivo de seguir achegando o cinema galego a vilas que non contan con salas comerciais. O circuíto, impulsado pola Academia Galega do Audiovisual co apoio das deputacións provinciais, consolídase como unha das principais ferramentas para ampliar o acceso da cidadanía ás producións máis destacadas do audiovisual galego.
A presidenta da Academia Galega do Audiovisual, Lucía Veiga, e a deputada de Cultura da Deputación da Coruña, Natividade González, presentaron este martes a nova edición do ciclo, que chegará aos concellos de Arzúa, Boiro, San Sadurniño, Betanzos, Cedeira e Zas.
Nesta ocasión, o público poderá ver oito títulos: 'Sirât', 'As liñas descontinuas', 'Antes de nós', 'San Simón', '360 curvas', 'O son da nova regueifa', 'Deuses de pedra' e 'O silencio herdado'. A programación combina ficcións e documentais, cunha mostra da diversidade de xéneros, miradas e formatos que atravesan o audiovisual galego actual.
Desde a súa posta en marcha en 2022, o Ciclo Mestre Mateo permitiu crear unha rede de exhibición en centros culturais, auditorios e bibliotecas, superando as limitacións dos circuítos comerciais. Na provincia da Coruña xa participaron 13 concellos, con 32 películas proxectadas, 171 sesións e 5.238 espectadores.
A deputada de Cultura, Natividade González, destacou a importancia de levar a cultura a todo o territorio e de apoiar unha industria audiovisual galega que atravesa un momento de especial proxección. Pola súa banda, Lucía Veiga subliñou o valor de manter programación audiovisual estable en localidades que non dispoñen de salas comerciais.