O ciclo HumanIA aborda na UDC a arte e a creatividade na era da intelixencia artificial
O Centro de Investigación en Tecnoloxías da Información e as Comunicacións (CITIC) da Universidade da Coruña (UDC) acollerá o próximo mércores, 13 de novembro, ás 17:30 horas, unha nova sesión do ciclo HumanIA, centrada na arte e a creatividade en tempos de intelixencia artificial. Esta serie de encontros, organizada polo Consello Social e a Facultade de Humanidades da UDC, en colaboración co CITIC, busca promover a reflexión sobre o papel das tecnoloxías emerxentes nas humanidades e a transformación dos postos de traballo neste ámbito.
Nesta ocasión, a sesión contará coa participación de Marta Suárez-Mansilla, directora de Artworld Law e recoñecida avogada especializada en arte, dereito e novas tecnoloxías. Suárez-Mansilla impartirá un taller no que abordará como a IA está a redefinir o campo artístico e cultural. Cunha destacada traxectoria en consultoría xurídica e xestión cultural, Suárez-Mansilla asesora en cuestións relacionadas co mercado da arte e a protección do patrimonio, integrando conceptos innovadores como o blockchain, o metaverso, os NFTs e a IA.
As prazas para o taller son limitadas, polo que se recomenda o rexistro previo a través do seguinte enlace.
A programación HumanIA, que arrancou o curso pasado, está deseñada para achegar á comunidade universitaria as novas oportunidades e desafíos que trae consigo a intelixencia artificial, con especial énfase en áreas como a arte, a cultura e a linguaxe. Na edición anterior, na que participaron máis de 400 persoas, destacaron intervencións de profesionais como o experto en dereito dixital Borja Adsuara Varela, o físico Paul Van Branteghem, a especialista en tecnomarketing Ruth Falquina e a asesora tecnolóxica Cristina Aranda, entre outros. Esta nova edición segue impulsando un diálogo enriquecedor sobre o impacto da IA nas humanidades e os retos que presenta para o futuro.