O CHUAC renovará a sala de radioloxía de Urxencias cun novo equipamento de máis de 249.000 euros
O Servizo de Urxencias do Complexo Hospitalario Universitario da Coruña (CHUAC) contará cunha nova sala de radioloxía dixital robotizada tras a adxudicación, por parte da Consellería de Sanidade, do equipamento necesario para a súa posta en marcha. O contrato foi concedido á empresa Siemens Healthcare, S.L. por un importe de 249.260 euros.
A actuación, publicada no Portal de Contratos de Galicia, permitirá modernizar os medios diagnósticos do hospital coruñés e optimizar os procedementos de imaxe que se realizan no Servizo de Urxencias.
Segundo destaca a Xunta, a incorporación desta nova sala mellorará a precisión diagnóstica, aumentará a eficiencia na adquisición dos estudos radiolóxicos e facilitará o traballo do persoal sanitario grazas a un equipamento máis avanzado e ergonómico.
O novo sistema contará cun equipo xerador de raios X, colimador, tubaxe de raios X con soporte telescópico de teito, mesa de exploración radiolóxica, bucky mural e detector dixital, elementos que permitirán ofrecer unha maior calidade nas probas diagnósticas.
Ademais da subministración do equipamento, a empresa adxudicataria será a encargada de realizar todas as actuacións necesarias para a súa instalación. O contrato establece un prazo de execución dun mes para completar os traballos e poñer en funcionamento a nova sala.