O Centro de Maiores A Baiuca prepara o Entroido con obradoiros interxeracionais de disfraces
O Concello de Arteixo organiza unha actividade interxeracional para celebrar o Entroido 2025 a través dos obradoiros de ambientación no Centro de Maiores A Baiuca. Estes talleres permitirán que as persoas participantes elaboren os seus propios disfraces co obxectivo de formar parte da Comparsa de Animación do centro durante as festas do Martes de Entroido, o próximo 4 de marzo.
Os obradoiros desenvolveranse en dúas sesións semanais: os martes, de 10:00 a 12:00 horas, e os xoves, de 16:00 a 17:30 horas. A actividade está aberta a persoas de todas as idades, promovendo a colaboración entre xeracións e reforzando os lazos comunitarios a través da creatividade.
A presentación oficial do programa terá lugar o martes 21 de xaneiro, ás 10:00 horas, no Centro de Maiores A Baiuca. Todas as persoas interesadas en participar poden inscribirse no propio centro ou a través do teléfono 981 659 095.
Esta iniciativa, impulsada polo Concello de Arteixo, destaca polo seu carácter integrador e pola aposta por fomentar a participación activa da cidadanía nas celebracións culturais do municipio.
