Deportes

O preinfantil masculino viaxará do 30 de xaneiro ao 1 de febreiro e o club mallorquín devolverá a visita a Culleredo do 10 ao 12 de abril

O Club Baloncesto Culleredo participará por primeira vez nun programa de intercambio deportivo, unha iniciativa que busca potenciar a convivencia, a aprendizaxe e o crecemento persoal a través do deporte. Nesta estrea, o club coruñés colaborará co CBLS de Palma de Mallorca.

O equipo preinfantil masculino (PIM) será o encargado de representar á entidade neste proxecto e desprazarase á illa entre o 30 de xaneiro e o 1 de febreiro, para tomar parte nunha axenda que combinará convivencia entre clubs e actividade competitiva.

Durante a estancia, xogadores e corpo técnico compartirán adestramentos, partidos e propostas conxuntas, co obxectivo de reforzar valores como o respecto, a amizade, o compañeirismo e o intercambio de experiencias deportivas e persoais.

O programa terá continuidade en Culleredo coa visita do equipo do CBLS, prevista para os días 10, 11 e 12 de abril, cando se desenvolverá a segunda parte do intercambio, centrada na acollida e na convivencia na localidade.