O Castelo de San Antón acolle o sábado a Noite Internacional da Observación da Lúa
Este sábado, 14 de setembro, o Castelo de San Antón celebrará a Noite Internacional da Observación da Lúa, unha xornada promovida pola NASA a nivel global. O evento contará coa colaboración do Concello e da Agrupación Astronómica ÍO e terá lugar no xardín traseiro da planta alta do castelo, de 20:00 a 23:00 horas.
Durante a sesión, aberta ao público e de balde, os asistentes poderán observar a Lúa a través de telescopios proporcionados pola Agrupación Astronómica ÍO. A actividade incluirá explicacións divulgativas sobre a Lúa e a súa conexión coa ciencia e a exploración planetaria da NASA. Non será necesaria inscrición previa, pero a capacidade será limitada e respectará a orde de chegada.
O concelleiro de Cultura e Turismo, Gonzalo Castro, destacou a importancia desta actividade como parte da programación cultural e científica do Goberno de Inés Rey. Castro subliñou que o evento permite aproveitar a versatilidade do Castelo de San Antón e visibilizar este enclave patrimonial da cidade.
En caso de que as condicións meteorolóxicas non sexan favorables, o Concello informará das posibles modificacións na súa páxina web e canles oficiais.