O campamento Concilia de Arteixo achega aos máis pequenos as profesións do mar co programa 'Movemento Azul'
O campamento municipal Verán-Concilia de Arteixo converteuse este venres nunha aula para descubrir o mundo do mar coa chegada do programa 'Movemento Azul', unha iniciativa da Consellería do Mar destinada a achegar á infancia as oportunidades profesionais e o valor ambiental do sector marítimo-pesqueiro.
A conselleira do Mar, Marta Villaverde, visitou o Centro de Educación Especial C.P.R. Agarimo, onde se desenvolveu a actividade coa participación de 88 nenos e nenas de entre 7 e 11 anos.
Durante a visita, a responsable autonómica destacou a importancia de espertar desde idades temperás o interese polas profesións vinculadas ao mar, dando a coñecer saídas laborais relacionadas coa pesca, o marisqueo, a investigación mariña e a sustentabilidade ambiental.
Os obradoiros de 'Un Mar de Profesións' organízanse arredor de tres espazos temáticos móbiles, elaborados con mobiliario fabricado a partir de subprodutos do mar para promover tamén os principios da economía circular.
Nun deles, os escolares coñeceron artes tradicionais de pesca e aprenderon a comprobar as tallas mínimas dos bivalvos empregando calibres reais. Noutra estación descubriron a biodiversidade das rías galegas mediante actividades de identificación da fauna mariña. Finalmente, na zona dedicada á navegación, practicaron o cálculo de rutas e o uso de cartas náuticas, regras e compases para comprender como se planifican as travesías marítimas.
Ao remate do percorrido, os participantes recibiron un 'Pasaporte de profesións do mar', un diploma simbólico co que a Xunta pretende recoñecer o seu compromiso co coñecemento e a protección do medio mariño galego.