O cambrés Xerome Pena proclámase campión de España xuvenil de Agility con Lima
O cambrés Xerome Pena, de 15 anos, proclamouse campión de España xuvenil de Agility xunto á súa cadela Lima. O binomio conseguiu o primeiro posto na categoría 30/40 durante o XII Campionato de España da Real Federación Española de Caza (RFEC), disputado en Arcos de la Frontera (Cádiz).
Pena forma parte do Club de Agility CocoCan, ao que tamén pertencen outros mozos deportistas de Cambre. A competición reuniu arredor de 460 cans e 350 participantes chegados de distintos puntos do país, nunha das principais citas do calendario estatal desta modalidade.
O triunfo nacional súmase aos bos resultados que o cambrés vén conseguindo nas competicións galegas. Xunto a Lima, proclamouse campión da Liga Xuvenil de Galicia, mentres que co seu outro can, Hipo, acadou os subcampionatos da Liga Absoluta Galega e da Copa Galega.
Detrás destes resultados están os adestramentos, a constancia e a coordinación entre o guía e os animais. O traballo do seu adestrador, Jacobo Martí, coñecido como Coco, e o apoio dos compañeiros do club tamén forman parte do camiño que levou a Xerome a conquistar o título estatal.
O Agility é unha disciplina deportiva na que o guía debe dirixir o can a través dun circuíto de obstáculos, como saltos, túneles e pasarelas, procurando completar o percorrido correctamente e no menor tempo posible. A modalidade require velocidade, concentración e unha estreita compenetración entre ambos.