O calendario municipal de Betanzos 2025 levará a imaxe do 150 aniversario do Globo de San Roque
O Concello de Betanzos presentou a imaxe gráfica que conmemorará o 150 aniversario do Globo de San Roque, o aeróstato de papel máis grande do mundo. A obra, realizada polo deseñador gráfico Luis Galán, foi seleccionada nun concurso organizado pola Fundación Globo de San Roque e destaca as cores tradicionais do globo (negro, azul, vermello, verde e amarelo), ademais de incorporar elementos icónicos de Betanzos como as galerías da praza do Campo, a torre de San Domingos e os históricos farois da praza.
A alcaldesa de Betanzos e presidenta da Fundación, María Barral, anunciou que esta imaxe será a portada do calendario municipal de 2025 e se presentará oficialmente na feira internacional de turismo Fitur, en Madrid. Ademais, empregarase en materiais promocionais e impresos oficiais ao longo do ano.
O 150 aniversario do primeiro globo, confeccionado por Claudino Pita, será o eixo central da promoción turística de Betanzos en 2025. “O Globo é a imaxe da nosa cidade, un referente único na promoción turística que nos identifica e que será protagonista das nosas campañas,” destacou a alcaldesa.
Barral sinalou que a campaña incluirá non só o Globo, senón tamén outros aspectos destacados de Betanzos, como a súa historia, cultura, o centro histórico, o comercio, as festas patronais e a súa recoñecida gastronomía, coa tortilla como estandarte.
O Concello e a Fundación Globo de Betanzos planificarán accións promocionais ao longo de todo o ano e buscarán a colaboración doutras administracións, como sucedeu nos actos do 800 aniversario da cidade. Barral tamén anunciou que xa mantivo conversas coa Dirección Xeral de Turismo e a Deputación para coordinar esta celebración.