O calendario municipal de 2026 de Oleiros pon o foco en camiñar e na paisaxe peonil do concello
O Concello de Oleiros comezou a repartir nos fogares o calendario municipal de 2026, unha edición que convida a reivindicar o acto de camiñar como algo cotián e transformador, tanto para o lecer como para a saúde, a mobilidade diaria e a mellora ambiental nas vilas e cidades. A proposta acompaña os 12 meses do ano con imaxes de espazos peonís do municipio e pensamentos que animan a escoller os desprazamentos a pé (ou en bicicleta) sempre que sexa posible.
A publicación abre co parque da Lagoa de Mera e continúa, mes a mes, cun percorrido por algunhas das localizacións máis recoñecibles da rede de paseos e sendas oleirenses. En xaneiro, o calendario detense no parque Santiago Carrillo da Pezoca cunha cita de John Ruskin sobre o pracer dun paseo tranquilo. Febreiro traslada a escena á beira do mar en Santa Ana, cos faros de Mera ao fondo, e incorpora unha reflexión do poeta Alfred Tennyson arredor do camiño da vida.
A imaxe dunha árbore destacada na finca Tenreiro de Nós, xunto a unha senda, introduce unha idea do sociólogo William Holly Whyte: as persoas tenden a camiñar cando dispoñen de lugares axeitados para facelo. Abril sitúa o protagonismo nas sendas do parque das Trece Rosas, acompañado dunha frase de Hermann Hesse sobre os paralelismos entre os camiños e a vida. Maio, pola súa banda, rescata unha reflexión popular sobre a necesidade de avanzar amodo cando a meta é ambiciosa, sobre unha fotografía do parque Rosalía Mera de Dorneda.
En xuño aparece o concorrido paseo da ría, en Perillo, coa achega do urbanista Jan Gehl, que subliña a importancia da mobilidade natural (camiñar e moverse en bici) e a sustentabilidade urbana. A senda do Rego de San Pedro, paralela á N6 por Iñás e Nós e reservada para uso ciclista e peonil, serve despois para unha mensaxe minimalista que entende o tropezo como parte da aprendizaxe.
O calendario tamén mira á praia e aos espazos naturais. Bastiagueiro en marea baixa, con xente camiñando pola beira, acompaña unha cita de Colin Buchanan sobre a liberdade humana e a 'calidade civilizada' das áreas urbanas. Setembro recala nun recuncho do xardín romántico de Montrove, nas ruínas do Pazo Ibarrola, cun texto anónimo sobre como o coñecemento e os sentidos se fortalecen ao camiñar. En outubro, a fronte marítima e o Parque Luís Seoane de Santa Cruz, co Castelo ao fondo, incorpóranse co recordo de Eduardo Galeano á idea de caer e erguerse para volver ao camiño.
Novembro amosa unha ruta no Monumento Natural de Serantes e Dexo, co horizonte do mar Ártabro e unha senda na que participan numerosas persoas, apoiada nunha frase que convida a pensar no paso do tempo. O peche chega en decembro no parque de Bastiagueiro coa coñecida idea de Antonio Machado: 'o andar fai o camiño'.