O BNG propón axudas para as vivendas de Bergondo que aínda carecen de saneamento
O BNG de Bergondo defendeu no último pleno municipal unha iniciativa para compensar ás vivendas que aínda non dispoñen do servizo de saneamento e que, por este motivo, deben recorrer a sistemas alternativos como as fosas sépticas.
A proposta da formación nacionalista pasa por establecer algún tipo de bonificación para sufragar o custo do baleirado destas instalacións mentres a rede municipal non chegue ás zonas afectadas. Entre as opcións expostas figuran subvencionar un baleirado anual, financiar parte dos servizos realizados ou crear unha taxa específica que permita acceder a varios baleirados a un prezo reducido.
O portavoz do BNG, David Carro, sostén que o saneamento é un servizo básico que debe garantir o Concello e considera que as persoas residentes nas zonas onde aínda non existe esta infraestrutura asumen un sobrecusto derivado do mantemento das fosas sépticas. Ao seu xuízo, a medida tamén contribuiría a fomentar un mellor control destas instalacións e a reducir posibles riscos ambientais e sanitarios.
A iniciativa foi aprobada no pleno, aínda que contou coa abstención dos grupos que integran o goberno municipal, PSOE e Alternativa dos Veciños. Desde o BNG agardan que ese respaldo permita avanzar na posta en marcha da medida e que a proposta non quede sen desenvolver, como, segundo sostén a formación, ocorreu con outras iniciativas aprobadas anteriormente.