O BNG pide abrir ao público a urbanización do polígono de Santo Amaro tras rematar as obras
O BNG reclamou ao Goberno local da Coruña que abra ao público as obras de urbanización do polígono de Santo Amaro, xa rematadas, ao considerar que o peche do ámbito está a prexudicar a mobilidade da veciñanza.
A portavoz municipal da formación nacionalista, Avia Veira, rexistrou un rogo oral para que o executivo municipal adopte esta medida, atendendo tamén á demanda expresada polos residentes da zona.
Segundo explica o BNG, os traballos iniciáronse en xuño de 2024 e permitiron crear novas conexións entre as rúas Orillamar, San Pedro, Santo Amaro e Fonte de Santo Amaro, ademais de mellorar a accesibilidade entre estes viarios e o Paseo Marítimo.
A actuación tamén incluíu a adecuación do espazo situado entre o Paseo Marítimo e a rúa Regata Cutty Sark, un itinerario utilizado habitualmente pola veciñanza de Durmideiras e das rúas da contorna.
Con todo, a formación asegura que, malia estar rematada a urbanización, o espazo continúa pechado, o que limita os desprazamentos peonís da veciñanza.
Por este motivo, Avia Veira trasladará esta petición ao pleno municipal previsto para o mes de setembro, co obxectivo de instar ao Goberno local a abrir canto antes as novas infraestruturas ao uso público.