O BNG leva de novo ao Congreso a crise de Losán para pedir a implicación da SEPI
O BNG volverá levar ao Congreso a situación do Grupo Losán. O deputado nacionalista Néstor Rego formulará unha pregunta oral ao Goberno do Estado na Comisión de Industria do vindeiro mércores, 20 de maio, para reclamar unha participación activa da SEPI no deseño dun plan de viabilidade para a compañía.
A iniciativa busca presionar ao Executivo central para que se implique na continuidade da actividade industrial e no mantemento dos postos de traballo nas fábricas de Curtis e Vilasantar, dúas instalacións cun peso relevante no sector da madeira e no tecido económico da comarca.
A formación nacionalista sitúa a súa reclamación nun contexto de forte incerteza laboral. Segundo denuncia, a empresa atravesa unha situación marcada pola falta de pagamento de nóminas, os despedimentos colectivos e as dúbidas sobre o futuro do grupo. Rego sostén que cada semana de atraso agrava a situación das familias afectadas e reduce as opcións de garantir unha saída industrial.
O deputado lembra que o Congreso xa aprobou recentemente unha iniciativa do BNG na que se instaba ao Goberno do Estado a adoptar un papel activo e a implicar á SEPI no deseño dun plan de viabilidade para Losán. Por iso, defende que agora o Executivo debe cumprir ese mandato e actuar de forma directa.
Rego tamén vincula a crise actual co volume de recursos públicos recibidos pola empresa nos últimos anos. O BNG sinala que a SEPI inxectou 35 millóns de euros ao grupo a través do fondo de solvencia post-covid, aos que suma 7 millóns do IGAPE e avais do ICO por valor de 19 millóns.
Para o Bloque, a SEPI debe exercer un papel de mediación e coordinación xunto coa Xunta, a dirección da empresa e os comités das fábricas de ASERPAL e LOSAN. O obxectivo sería impulsar un plan de sustentabilidade e pagamentos que permita asegurar a viabilidade da compañía e dar garantías ao persoal.
Ademais, Rego prevé advertir ao Goberno da necesidade de avaliar os resultados dos investimentos públicos realizados no sector industrial. A formación reclama reformas para impedir que empresas beneficiarias de fondos públicos poidan acabar aplicando EREs, despedimentos ou procesos de desmantelamento industrial.