O BNG insta á Xunta a activar un plan de axudas para o sector pesqueiro afectado pola pesca do xurelo
As candidatas do BNG Mercedes Queixas, Rosana Pérez e Iria Taibo, números 2, 3 e 8 da lista, respectivamente, mantiveron esta mañá un encontro coa Confraría de Pescadores de Sada e a Asociación de Armadores de Cerco de Galiza, representadas por quen é secretario destas dúas entidades, Alberto Castro.
“Cada vez estamos peor. Isto é o que nos acaban de transmitir os mariñeiros e armadores cos que nos reunimos na sede da Confraría de Pescadores de Sada”, relata Queixas. “A frota do cerco está novamente amarrada, sometida a novas vedas, recortes e cotas que na práctica prohiben a pesca do xurelo (só están permitidas as capturas accidentais, cando se vai a outras pescarías)”, engade.
A candidata o BNG denunciou que somos unha nación altamente dependente da pesca, mais a Xunta de Galiza non fixo nada durante 15 anos para lograr ese recoñecemento. “A Xunta tense que pór á fronte da defensa do sector pesqueiro galego, estratéxico para a nosa economía”, demanda Queixas á vez que insta o Goberno galego a “que active inmediatamente un plan de axudas complementarias para a xente do mar, mariñeiros e armadores, que minimice os graves prexuízos decorrentes dos recortes sistemáticos das nosas pescarías”.
Por outro lado, as candidatas nacionalistas partillaron cos representantes do sector a necesidade, fundamental, de que Galiza se dote dun instituto galego propio de investigación biolóxica sobre os recursos mariños e de pesca dos que dispomos que poda asesorar elaborando informes propios.“É a única forma de termos un coñecemento exacto da potencialidade dos nosos recursos e da nosa capacidade pesqueira sen termos que depender de informes de institutos alleos que, naturalmente, obedecen a outros intereses”, concluíu Mercedes Queixas.