O BNG denuncia no Parlamento a falta de persoal no COF de Orillamar e alerta de graves atrasos na atención sanitaria
O BNG volveu a levar ao Parlamento galego a situación do Centro de Orientación Familiar (COF) de Orillamar, denunciando que segue sen contar coas dúas prazas de xinecoloxía cubertas a tempo completo, como debería ser por normativa. Segundo a deputada nacionalista Mercedes Queixas, este problema está a xerar longas listas de espera e limitacións na atención á saúde sexual e reprodutiva das mulleres.
A formación nacionalista, tras reunirse co persoal do COF, constatou que unha das prazas de xinecoloxía permanece vacante dende 2020, sendo cuberta de maneira intermitente. Esta falta de estabilidade afecta a unhas 80 pacientes que precisan seguimento, incluíndo mulleres que realizaron interrupcións voluntarias do embarazo.
Queixas critica que, a pesar de ser un centro de referencia na área da Coruña, a calidade da atención leva anos en declive debido aos recortes de persoal por parte da Xunta. Ante esta situación, o BNG presentou unha nova batería de iniciativas no Parlamento galego para esixir a cobertura completa do persoal sanitario e garantir unha atención adecuada.