Política

Os nacionalistas critican a ausencia de substitucións durante o verán e advirten de que a situación afecta tanto ao servizo de Pediatría como ao de Traballo Social

O BNG de Betanzos trasladou publicamente a súa preocupación pola situación que, segundo asegura, están a vivir as familias usuarias do centro de especialidades da localidade tras coñecerse que durante os meses de verán non estarán garantidos todos os controis de saúde pediátricos programados.

A voceira nacionalista, Amelia Sánchez, explicou que nos últimos días apareceu un aviso no servizo de Pediatría no que se informa de que as ausencias do persoal durante o período estival non serán cubertas na súa totalidade. Como consecuencia, darase prioridade ás revisións dos nenos e nenas menores de 15 meses, mentres que o resto dos controis previstos entre o 15 de xuño e o 15 de setembro poderán ser adiados ata despois do verán.

Desde o BNG consideran que esta situación evidencia unha deficiente planificación por parte do Servizo Galego de Saúde e critican que non se garantan as substitucións necesarias para manter a actividade asistencial durante as vacacións do persoal.

A formación sostén que o adiamento destas revisións non só deixa sen realizar os controis correspondentes durante o verán, senón que tamén pode provocar unha maior presión asistencial nos meses posteriores ao acumularse as citas coincidindo co inicio do outono, unha época na que adoita incrementarse a demanda nos servizos pediátricos.

Ante esta situación, o BNG anunciou que impulsará iniciativas tanto no ámbito municipal como no Parlamento galego para reclamar solucións que garantan a continuidade da atención sanitaria á infancia.

As críticas da formación nacionalista esténdense tamén ao funcionamento do servizo de Traballo Social do centro de especialidades. Segundo explica, nas últimas semanas recibiu queixas de persoas usuarias pola ausencia de atención tras a baixa laboral da profesional responsable, unha vacante que, segundo denuncian, non foi cuberta coa rapidez necesaria.

O BNG considera que esta falta de substitución repercute directamente na cidadanía, especialmente nun servizo no que moitos trámites deben resolverse dentro de prazos concretos e afectan a persoas con necesidades sociais e sanitarias.

Por todo iso, a formación reclama á Consellería de Sanidade que garanta a cobertura das baixas e das vacacións do persoal sanitario e dos servizos de apoio, co obxectivo de evitar interrupcións na atención e asegurar unha resposta adecuada ás necesidades da veciñanza.