O BNG de Miño pide melloras nos accesos ás pistas da Galea e accións urxentes no CPI Castro Baxoi
O BNG levará ao pleno deste mes a demanda de melloras no acceso ao entorno das pistas da Galea, situadas na rúa Raxel, preto da Praza do Parchís. A formación sinala que as infraestruturas actuais non se axustan á crecente demanda da zona, que conta cun aparcadoiro, pistas deportivas, un novo “pumptrack” e a futura área de caravanas, e denuncia que os accesos non son seguros nin adecuados.
O voceiro do BNG, Alberte G. Nicolás, advertiu das carencias existentes: "A rúa é estreita, de dobre sentido, con estacionamento a ambos lados, e o túnel baixo a N-651 actúa como un funil, dificultando o paso de vehículos e deixando un espazo elevado impracticable para peóns, cadeiras de rodas e carriños." Por iso, propoñen unha intervención conxunta entre o Concello e o Estado, xa que se trata de vías de diferente titularidade. "Debe haber interlocución directa entre as administracións para alcanzar un acordo," engadiu Nicolás.
A proposta inclúe a ampliación do paso baixo a N-651, o ensanchamento das beirarrúas e a mellora do acceso ao aparcadoiro desde as vivendas, mediante a instalación de escaleiras ou ramplas á saída do túnel, co fin de minimizar a perda de prazas de estacionamento na rúa Raxel.
Mantemento no CPI Castro Baxoi e compromiso polo 25N
Ademais, o BNG reclamará melloras urxentes no CPI Castro Baxoi e na súa contorna, destacando que estas actuacións, que son responsabilidade do Concello, levan tempo sendo postergadas. "O momento das declaracións de intencións xa pasou; é hora de mellorar a situación do centro educativo," sinalou Alberte G. Nicolás, quen tamén criticou a xestión do goberno galego, afirmando que "o PP segue co seu plan de deteriorar os servizos públicos, e o goberno local debe demostrar que hai unha forma distinta de facer as cousas."
Por último, o BNG defenderá no pleno unha moción en apoio ao 25 de novembro, Día Internacional contra a Violencia de Xénero. A formación pedirá á Xunta de Galicia compromisos concretos en materia de financiamento e recursos para garantir a atención integral ás vítimas de violencia machista. "Cada 25N é unha ocasión para honrar ás mulleres e colectivos que poñen a violencia machista no centro do debate político, e a mellor forma de facelo é avanzar con medidas efectivas desde as administracións," concluíu o portavoz.