O BNG de Coirós reclama a rotonda de Queirís tras un novo accidente na N-VI
O novo accidente rexistrado o pasado domingo no cruzamento de Queirís, na N-VI ao seu paso por Coirós, volveu poñer o foco na seguridade viaria deste punto. O BNG de Coirós reclama novamente a construción dunha rotonda nesta intersección, unha actuación que, segundo a formación, leva anos sendo demandada pola veciñanza.
A portavoz municipal do BNG, Pura Ferreño, considera que a sucesión de accidentes evidencia a necesidade de actuar para mellorar a seguridade e evitar consecuencias máis graves no futuro. O último sinistro, especialmente aparatoso, deixou unha persoa ferida leve.
Ferreño lembra que a construción da rotonda é unha reivindicación histórica e critica que o Goberno do Estado non dera luz verde á actuación. Segundo explica, desde 2020 o Executivo estatal argumenta que este tramo non está considerado un punto de concentración de accidentes, unha consideración que, para o BNG, non debería impedir a adopción de medidas preventivas.
'Non podemos depender da sorte cada vez que se produce un accidente neste punto', sinala Ferreño, que insiste en que a sucesión de sinistros 'demostra que existe un problema de seguridade viaria que debe ser abordado canto antes'.
O BNG de Coirós anuncia ademais o rexistro de novas iniciativas no Congreso para reclamar ao Goberno central que desbloquee a actuación e avance na execución da rotonda.
A formación nacionalista considera que a mellora da seguridade viaria debe prevalecer sobre a clasificación estatística do tramo e advirte de que non se debería agardar a que se produza un accidente de maior gravidade para adoptar medidas.