O BNG da Coruña esixe unha inversión adicional de 120 millóns para a provincia nos Orzamentos da Xunta
O BNG presentou este luns as súas emendas aos orzamentos da Xunta de Galicia para 2026, esixindo unha inversión adicional de 120 millóns de euros destinada á Coruña e á súa comarca. As deputadas Mercedes Queixas e Iria Taibo denunciaron que a cidade e o seu contorno están a ser ignorados nas contas autonómicas.
“Nin a cidade nin a comarca reciben o trato que merecen nos orzamentos da Xunta”, afirmaron ambas parlamentarias durante a rolda de prensa, criticando tamén a falta dun proxecto claro para a Coruña.
Queixas cualificou ao Partido Popular como un “pésimo xestor”, sinalando o incumprimento de partidas orzamentarias en 2025, como a destinada ao Albergue de Peregrinos, e o atraso en obras como a reforma da residencia de maiores Torrente Ballester ou o Centro de Formación da Cidade das TIC, que quedaron aprazadas para 2026.
Ademais, as deputadas alertaron de que os orzamentos de 2026 son “decrecentes” en investimentos fundamentais, como a ampliación do Hospital Universitario da Coruña (CHUAC), que conta con menos fondos dos inicialmente anunciados. “Feijoo anunciou que en 2025 as obras estarían rematadas nun 80%, cando en realidade apenas se avanzou un 10%”, destacaron. Tamén criticaron a drástica redución, próxima ao 50%, dos fondos destinados aos centros educativos públicos, así como a falta de reforzo nos Centros de Orientación Familiar.
Frente a esta situación, o BNG presentou un proxecto alternativo que considera “verdadeiramente comprometido coas coruñesas e os coruñeses”. Entre as emendas máis destacadas figura a recuperación de 60 millóns para a ampliación do CHUAC, un plan ambicioso para facilitar o acceso á vivenda pública con 40 millóns destinados a alugueres sociais, rehabilitación, cooperativas de cesión de uso e máis prazas residenciais para estudantes universitarios e de formación profesional. Tamén piden reforzar os servizos públicos, desde centros de saúde até residencias de maiores.
Concretamente, propoñen aumentar o persoal sanitario nos centros de saúde do Ventorrillo e Orillamar, completar a carteira de servizos no centro de Novo Mesoiro, e crear un centro de día e unha residencia pública para maiores, unha necesidade sen cubrir tras 16 anos de goberno do PP.
En educación, as emendas contemplan fondos para reformar os colexios Prácticas e Cidade Vella, abrir unha escola infantil no barrio de Xuxán e construír un novo colexio nesa zona en expansión.
En cultura, o BNG esixe que a Xunta deseñe un plan para poñer en valor o legado da Fundación Luís Seoane e que aumente a financiación ao Consorcio para a Promoción da Música, co obxectivo de reducir a débeda que mantén coa Orquestra Sinfónica de Galicia.
En canto á comarca, as propostas inclúen a creación dunha escola infantil en Oleiros, máis prazas públicas en residencias de Cerceda e Carral, e unha partida de 5 millóns para un Plan de Industrialización.
“Non vemos á comarca da Coruña nestes orzamentos. Non hai o mínimo compromiso da Xunta con ela”, lamentou Iria Taibo, que tamén denunciou a falta de transparencia nas contas: “Faltan partidas específicas e territorializadas, o que dificulta moito o traballo da oposición e supón un engano á cidadanía”. Taibo criticou ademais a insuficiente política de vivenda, con apenas 80.000 euros orzamentados para solo en Arteixo, e a ausencia de planificación en materia de mobilidade: “Seguen sen planificar a conexión da Vía Ártabra coa A6, unha actuación que si inclúen as nosas emendas”.