O BNG comprométese a crear un plan de impulso do galego entre a mocidade
Mercedes Queixas, a número 2 da candidatura do BNG por A Coruña, mantivo esta tarde na Coruña un encontro sobre a Lingua con xente moza organizado por Galiza Nova, a organización xuvenil do BNG e no que tamén tomou parte Iria Taibo, a número 8 das listas polo provincia. Durante o encontro a nacionalista anunciou que a alternativa de goberno liderada por Ana Pontón derrogará o Decreto do Plurilingüismo -por ser un decreto do monolingüismo en castelán- para o substituír por unha Lei de Igualdade para o Galego.
“Moitas e moitos de vós contastes que entrastes na escola falando galego e saístes falando castelán. A escola non pode ser un elemento de desgaleguización”, denunciou Queixas. Os mozos que participaron no encontro partillaron as súas vivencias arredor da lingua. “Fixen tres mestrados en universidades galegas e en ningún deles recibín ningunha aula en galego”, criticou un mozo. “Faltan filmes e series en galego”, interveu unha moza. “Por vez primeira na historia o galego xa non é a lingua maioritaria no país”, engadiu outro rapaz.
“Agradecémosvos moitísimo as vosas achegas e a vosa paixón por resituar o galego onde merece estar como lingua propia do país”, dixo Queixas, quen a modo de conclusión avanzou que o próximo Goberno galego, con Ana Pontón na presidencia, outorgará ao galego un papel transversal. “A promoción da lingua atravesará toda a acción do goberno”, dixo.
Entre as medidas concretas, anunciou un plan de impulso do galego entre a mocidade e a reforma da Lei de Normalización Lingüística. “É unha norma de 1983 que xa non se aquela á realidade actual. Temos que perseguir a igualdade. Que o galego deixe de estar en inferioridade de condicións a respecto do castelán. Garantir a plena competencia lingüística das novas xeracións, quer oral quer por escrito. E pór o galego alí onde non está ou alí onde está -nos medios de comunicación, nas plataformas televisivas, nas aulas universitarias, nos xulgados- de forma moi marxinal”, concluíu.