O BNG acusa á Xunta de deixar a Orquestra Sinfónica de Galiza con 5 millóns de euros de débeda e exixe accións inmediatas
O BNG alertou que a Xunta de Galicia debe actualmente 5 millóns de euros á Orquestra Sinfónica de Galiza, a pesar de que o convenio de financiamento establece unha achega de 3 millóns anuais por parte da Administración autonómica. Este incumprimento está a comprometer seriamente a viabilidade do proxecto musical e educativo da Orquestra, que inclúe tamén a Orquestra Xove e agrupacións infantís e que é unha referencia tanto a nivel nacional como internacional.
A concelleira do BNG, Mercedes Queixas, rexistrou unha serie de preguntas por escrito ao Goberno local para obter clarificación sobre a situación. Entre outras cuestións, Queixas quere saber desde que ano a Xunta comezou a incumprir o convenio, cal é a cantidade exacta que debe e que anualidades ingresou desde 2009 para o financiamento da Orquestra Sinfónica de Galiza.
Queixas tamén cuestiona o Executivo coruñés sobre as xestións realizadas para que a Xunta salde a débeda e que respostas lle deu o Goberno galego sobre o incumprimento do convenio. Ademais, a concelleira nacionalista, que tamén trasladará este asunto ao Parlamento galego na súa calidade de deputada, solicita información sobre a partida que a Xunta ten prevista para a Orquestra Sinfónica de Galiza nos orzamentos de 2025.