O Bar Galicia conquista por quinta vez o premio do público á mellor tortilla de Betanzos
A tortilla do Bar Galicia volveu conquistar o favor dos comensais e fíxose co premio do público na Semana da Tortilla de Betanzos por quinta vez. A proposta deste establecemento foi a máis votada entre os doce locais participantes na edición deste ano, consolidando a súa traxectoria nun certame que cada ano pon en valor un dos produtos gastronómicos máis representativos da cidade.
O Bar Galicia xa obtivera este recoñecemento en anteriores edicións, do 2020 ao 2023. Con este novo galardón, suma cinco vitorias na categoría popular. Ademais, o establecemento tamén conseguiu o premio do xurado profesional nas edicións de 2021 e 2022, o que reforza o seu historial no concurso.
O segundo posto da votación popular foi para o Mesón Café de Segundo, mentres que a Adega Lastras quedou en terceira posición. A entrega do premio tivo lugar este xoves pola mañá e contou coa participación da alcaldesa de Betanzos, María Barral, e da concelleira de Comercio, Anxeles Veiga, que fixeron entrega do galardón Esther Corral Martínez.
Café Segundo e Jorge Río Cortés completan o palmarés
Co recoñecemento ao Bar Galicia péchase a relación de premiados da Semana da Tortilla deste ano. Na modalidade de xurado profesional, o galardón á mellor Tortilla de Betanzos foi para Café Segundo, que destacou entre as propostas avaliadas polo xurado.
Pola súa banda, Jorge Río Cortés volveu levar o premio á tortilla caseira, un recoñecemento que consegue por terceira vez. A súa vitoria súmase así aos galardóns concedidos nas outras categorías do certame.
A Semana da Tortilla, organizada polo Concello de Betanzos, reúne cada ano establecementos hostaleiros arredor dunha das elaboracións máis emblemáticas da gastronomía local. A votación popular permite que os propios consumidores escollan a súa favorita, mentres que o xurado profesional avalía as propostas participantes para decidir o premio principal.