O Aquarium Finisterrae abre as súas zonas técnicas cunha visita para achegar a ciencia á cidadanía
O Concello da Coruña organizará o vindeiro sábado 10 de outubro a actividade de divulgación científica 'Viaxe ao centro do Aquarium', unha visita guiada que permitirá coñecer os espazos técnicos e os procesos que fan posible o funcionamento do Aquarium Finisterrae.
A actividade desenvolverase entre as 11.30 e as 13.30 horas e está orientada a achegar a ciencia e a educación ambiental á cidadanía. Durante a visita, o persoal técnico do centro acompañará as persoas participantes por diferentes zonas de acceso habitual restrinxido ao público.
O percorrido incluirá as áreas de bombeo, filtración, laboratorio, cociña, corentenas e a sala de cultivos auxiliares, onde os asistentes poderán coñecer de primeira man os sistemas empregados no funcionamento diario das instalacións.
A visita permitirá tamén observar os recursos necesarios para manter en condicións óptimas os millóns de litros de auga mariña que circulan cada día polos tanques do Aquarium e coñecer os traballos relacionados coa conservación da biodiversidade mariña.
As persoas participantes poderán, ademais, formular preguntas ao persoal técnico sobre o funcionamento do centro, os sistemas de mantemento da auga e os métodos empregados para garantir o benestar dos organismos mariños.
A actividade está dirixida a maiores de 16 anos e conta cunha capacidade máxima de 12 participantes. O prezo da entrada é de 10 euros, aínda que será gratuíta para os membros da Asociación de Amigos da Casa das Ciencias, as persoas titulares da Tarxeta Vente e as persoas con discapacidade.
Con esta proposta, o Aquarium Finisterrae continúa coa súa programación de divulgación científica e educación ambiental, ofrecendo á cidadanía a posibilidade de coñecer o traballo técnico que se desenvolve entre bastidores para garantir o funcionamento do acuario e a conservación dos seus habitantes.