Novas vivendas públicas reabren o debate sobre a ampliación do Rexurbe no casco histórico de Betanzos
A entrega de dúas novas vivendas públicas no casco histórico de Betanzos serviu este martes para poñer de novo sobre a mesa a necesidade de ampliar o Plan Rexurbe na cidade. A alcaldesa, María Barral, reclamoulle á conselleira de Vivenda e Planificación de Infraestruturas, María Martínez Allegue, que a Xunta continúe coa adquisición de inmobles no centro histórico para rehabilitalos e incorporalos despois ao parque público en réxime de alugueiro.
As dúas vivendas entregadas sitúanse nas rúas Venela dos Clérigos e Alfolí e foron adxudicadas a menores de 36 anos. As beneficiarias pagarán alugueiros mensuais de 116 e 167 euros, dentro dun programa que busca facilitar o acceso á vivenda a prezos asumibles e, ao mesmo tempo, recuperar edificios situados en zonas históricas.
Betanzos foi un dos municipios pioneiros en Galicia na aplicación do Rexurbe. A través deste plan, a Xunta adquiriu ata o momento 17 inmobles na cidade para obter 22 vivendas. Deles, 15 edificios xa están rehabilitados e permitiron crear 20 novos fogares públicos.
Durante o acto de entrega de chaves, Barral defendeu que o programa demostrou ser útil tanto para dar resposta á demanda de vivenda como para avanzar na recuperación do patrimonio arquitectónico. Por iso, pediu que se abra unha nova fase de actuación e que se estuden inmobles noutras rúas do casco histórico, máis alá das zonas nas que se concentraron as últimas convocatorias.
A rexedora sostén que existen propietarios interesados en participar e unha demanda real de vivenda que obriga a seguir incrementando a oferta pública dispoñible. Nesa liña, apuntou tamén á próxima aprobación do novo PXOM como unha oportunidade para planificar o crecemento urbanístico e reservar solo para vivenda pública.
Barral lembrou ademais o acordo alcanzado coa Sareb, que permitirá que determinados terreos pasen a mans municipais co obxectivo de destinalos tamén á promoción de vivenda pública. A alcaldesa insistiu en que o reto require coordinación entre administracións e pediu á Xunta que manteña o seu compromiso con Betanzos a través de programas que combinen rehabilitación urbana e acceso á vivenda.