Néstor Rego pide un resultado histórico para o BNG o 29N nun mitin en Betanzos

ACoruñaXa
O cabeza de lista da formación nacionalista pola Coruña reivindicou o traballo realizado no Congreso e asegurou que o BNG é 'a forza que defende Galiza' e a máis útil para representar os intereses do país.
BETANZOS mitin bng
19 Nov 2026

O cabeza de lista do BNG pola provincia da Coruña, Néstor Rego, pediu este mércores en Betanzos un esforzo para conseguir un grande resultado electoral o próximo 29 de novembro, ao considerar que canto maior sexa a representación nacionalista no Congreso, maior será o peso político de Galiza. O deputado participou nun mitin xunto a Antón Tenreiro, candidato do BNG á Alcaldía de Betanzos; Carlos Díaz, candidato ao Congreso pola Coruña, e Mercedes Queixas, candidata e deputada no Parlamento galego.

Rego animou a traballar 'sen descanso' durante os últimos días de campaña e defendeu que o BNG é a forza que mellor representa os intereses de Galiza. 'Canta máis forza teña o BNG, mellor representada estará Galiza e máis peso político terá', afirmou, ao tempo que reivindicou a traxectoria da formación nacionalista e o seu compromiso coas demandas do país.

O deputado tamén dirixiu parte da súa intervención á mocidade galega, da que destacou a súa mobilización en defensa dunha vivenda digna, dos seus dereitos e contra o fascismo. Rego asegurou que, fronte aos tópicos, a mocidade non está resignada nin permanece na casa, senón que participa activamente en diferentes reivindicacións sociais. Neste sentido, expresou a súa confianza en que esa mobilización contribúa a que o BNG obteña un bo resultado o próximo 29 de novembro.

Reivindica os acordos e os avances conseguidos en Madrid

Durante o mitin, Néstor Rego fixo balance do traballo da formación nacionalista no Congreso e defendeu que o BNG é a forza que representa de maneira constante os intereses de Galiza. Lembrou que, cando chega á Cámara, o partido presenta medidas para afrontar os principais problemas do país, en referencia ao acordo de investidura asinado co Goberno central.

Entre os avances que reivindicou citou as bonificacións de até o 75% na AP-9 para usuarios recorrentes, que tamén se aplicaron á AP-53, e a transferencia da autopista AP-9, unha reclamación histórica de Galiza. Tamén destacou a creación de xulgados de violencia de xénero en Santiago, Ourense e Lugo, así como o reforzo dos existentes na Coruña e Vigo, e comprometeuse a seguir reclamando que se establezan tamén en Ferrol e Pontevedra.

En materia social, Rego puxo en valor as medidas para aumentar o financiamento da Lei de Dependencia, coa obriga legal de que o Estado achegue o 50% dos fondos, así como a ampliación dos permisos de maternidade e paternidade até as 19 semanas.

O candidato tamén destacou a condonación de 4.000 millóns de euros de débeda que, segundo sinalou, o BNG incorporou ao acordo de investidura, e criticou a posición do presidente da Xunta, Alfonso Rueda, contrario a esta medida. Rego atribuíu esa débeda á xestión do expresidente galego Alberto Núñez Feijóo e cuestionou o seu modelo de xestión.

O BNG preséntase como alternativa á dereita

Rego pediu a confianza dos votantes no BNG, ao que definiu como unha alternativa coherente e comprometida con Galiza e coas maiorías sociais. Ademais, defendeu que a formación nacionalista constitúe un 'baluarte' fronte ao bloque reaccionario das dereitas.

O deputado insistiu en que o voto ao BNG permitirá reforzar a representación galega en Madrid e continuar defendendo medidas que, segundo afirmou, contribúen ao avance dos dereitos sociais e democráticos e a mellorar as condicións de vida da cidadanía.

0.55953192710876