Nace a Cátedra Universitaria Resonac-UDC Sparking Truth para impulsar a investigación en enerxía
A Universidade da Coruña (UDC) e Resonac Graphite Spain S.A.U. presentaron este luns a Cátedra Resonac-UDC Sparking Truth, co obxectivo de impulsar a investigación e innovación en aplicacións relacionadas coa transición enerxética. Esta colaboración universidade-empresa permitirá crear o Laboratorio de Investigación en Sistemas de Transición Enerxética (LISTE-Resonac), que se dedicará a desenvolver materiais avanzados para mellorar procesos electroquímicos en fontes renovables, almacenamento de enerxía e captura de carbono.
A cátedra estará dirixida por Israel Temprano, investigador do Centro Interdisciplinar de Química e Bioloxía (CICA) da UDC e experto en química aplicada a tecnoloxías enerxéticas. Entre os obxectivos do proxecto atópanse a mellora de baterías e supercondensadores, co fin de aumentar a súa capacidade e reducir o impacto ambiental.
O reitor da UDC, Ricardo Cao, destacou a importancia desta iniciativa como parte do crecemento das cátedras universidade-empresa, que fortalecen a transferencia de coñecemento e a colaboración con compañías innovadoras. Na actualidade, a UDC conta con preto de 30 cátedras en diferentes áreas de coñecemento, sendo a maioría en campos como as Ciencias Sociais, Arquitectura e Enxeñaría.