Música, baile e deporte pechan hoxe o curso de actividades municipais en Coirós
Coirós celebra hoxe, sábado 6 de xuño, a clausura das actividades municipais do curso 2025-2026, unha cita pensada para reunir alumnado, familias e veciñanza arredor do traballo realizado nos últimos meses nas escolas culturais e deportivas.
A xornada comezará ás 18.00 horas no polideportivo da Cortella, onde terán lugar as exhibicións das actividades deportivas. A continuación, a celebración trasladarase ao anfiteatro para gozar das actuacións da escola municipal de música e baile tradicional.
Esta clausura completa o programa de fin de curso iniciado o pasado 28 de maio, cando xa se celebraron as mostras de coro e guitarra no salón de actos do centro social. Ademais, durante os últimos días tamén se puideron visitar os traballos realizados nas actividades de pintura e manualidades.
A iniciativa serve para poñer en valor a participación nas actividades municipais e o esforzo das persoas que, ao longo do curso, formaron parte das diferentes propostas culturais, artísticas e deportivas impulsadas no municipio.
Desde a OMIX animan á veciñanza a achegarse á Cortella para compartir unha tarde de exhibicións, música e baile coa que Coirós despedirá oficialmente o curso das súas actividades municipais.