Mundos Digitales volverá situar A Coruña como referente da creación dixital
A Coruña acollerá do 9 ao 11 de xullo a 24ª edición de Mundos Digitales, o Congreso Internacional de Animación, Efectos Visuais e Novos Media, unha cita que reunirá na cidade a destacados profesionais e empresas do sector audiovisual e da creación dixital.
A programación abordará os principais retos e transformacións da industria, con especial protagonismo da intelixencia artificial, a produción virtual, os videoxogos, os novos formatos narrativos e as experiencias inmersivas. O congreso incluirá conferencias, presentacións, talleres, demostracións, encontros profesionais, unha feira de emprego e o Festival Internacional de Animación.
A presentación celebrouse no Coruña Estudio Inmersivo (CEI), na Cidade das TIC, onde o presidente da Deputación da Coruña, Valentín González Formoso, destacou o apoio da institución a un evento que considera unha referencia europea e puxo en valor o papel do CEI como infraestrutura para impulsar o talento e a industria audiovisual galega.
Nesta edición, o CEI incorporarase á programación do congreso coa xornada profesional 'Producción Virtual: el futuro de la creación digital', centrada nas oportunidades que ofrece esta tecnoloxía para o sector.
Entre os relatores figuran profesionais de compañías e estudos internacionais como Netflix, TRIXTER ou Cinesite, ademais de representantes de produtoras españolas como El Ranchito.