Morgan presentará o seu novo disco, 'Hotel Morgan', no Teatro Colón en abril
A banda madrileña Morgan visitará A Coruña o próximo 5 de abril de 2025 para presentar o seu novo traballo de estudo, Hotel Morgan. O concerto, que terá lugar no Teatro Colón, forma parte da xira nacional coa que a formación regresa aos escenarios.
As entradas para esta actuación sairán á venda este venres, 13 de decembro, ás 12:00 horas, e estarán dispoñibles en Ataquilla e nos puntos de venda físicos habituais. O disco Hotel Morgan, gravado no Ocean Sound Studio en Aalesund (Noruega) baixo a produción de Martín García Duque, será lanzado o 31 de xaneiro de 2025 en todas as plataformas. Segundo a banda, este cuarto traballo crea un espazo único onde cada canción conta a súa propia historia.
“O Goberno de Inés Rey reafirma o seu compromiso coa promoción cultural e musical da cidade, ampliando a oferta con espectáculos en formatos máis reducidos e íntimos como o deste concerto no Teatro Colón”, destacou Gonzalo Castro, concelleiro de Cultura e Turismo.
Esta actuación forma parte do programa cultural municipal que busca consolidar A Coruña como un referente musical no noroeste de España, con propostas para todos os estilos e públicos.