Modiña Summit reúne na Coruña o sector da moda para analizar os retos da industria
A innovación, o emprendemento e o futuro do comercio serán algúns dos eixes da cuarta edición de Modiña Summit, que reunirá os días 4 e 5 de novembro na Coruña a profesionais, empresas, emprendedores e líderes de opinión vinculados á industria da moda.
O encontro busca reforzar a conexión da cidade co sector téxtil e creativo e impulsar a súa proxección como destino asociado á moda. Na presentación da cita, o concelleiro de Cultura e Turismo, Gonzalo Castro, destacou o peso desta industria na identidade coruñesa e a súa capacidade para xerar actividade económica, cultural e turística.
Unha das novidades desta edición será a organización dun Press Trip de Moda e Turismo pola Coruña. A iniciativa está dirixida a xornalistas e creadores de contido, que percorrerán distintos espazos da cidade para coñecer a súa relación coa industria téxtil, o comercio, a artesanía e a gastronomía.
A programación central desenvolverase o día 5 a partir das 16:00 horas no Work Café Santander. Entre as actividades previstas figura JF64 Emprende, un espazo no que nove proxectos relacionados coa moda e a industria téxtil presentarán as súas propostas ante un xurado especializado.
A xornada tamén abordará o impacto da intelixencia artificial no sector e as oportunidades de desenvolvemento do ecosistema galego da moda. Ademais, celebrarase unha mesa redonda sobre o potencial turístico da industria baixo o lema ‘A Coruña, destino moda. Galicia, destino moda’, así como un foro dedicado ao futuro do comercio e aos procesos de dixitalización.
O comunicador e experto en moda Josie será o encargado de ofrecer un relatorio especial dentro do programa.
Segundo os datos da organización, Modiña Summit 2026 contará coa participación de máis dunha trintena de líderes de opinión do sector e terá difusión a través das redes sociais e dos medios especializados. A cita pretende consolidarse como un foro de referencia en Galicia para analizar os cambios e as oportunidades dunha industria considerada estratéxica para a economía e a proxección exterior da comunidade.