Miño saca adiante por unanimidade un obradoiro de emprego comarcal e varias iniciativas para mellorar o transporte
O Concello de Miño celebrou onte un pleno ordinario no que a corporación municipal aprobou por unanimidade varios acordos clave relacionados co emprego, os investimentos municipais e a mobilidade na comarca.
Un dos puntos centrais foi a aprobación da agrupación dos Concellos de Miño, Pontedeume e Cabanas para tramitar conxuntamente a execución dun obradoiro de emprego. O acordo inclúe tamén a solicitude dunha axuda á Consellería de Emprego, Comercio e Emigración para financiar o programa, unha fórmula que permite sumar recursos e coordinación entre administracións locais para impulsar formación e inserción laboral.
Na mesma sesión, todos os grupos apoiaron a participación de Miño na segunda fase do Plan provincial de cooperación ás obras e servizos de competencia municipal, coñecido como Plan único de concellos, na súa modalidade ‘POS+ Adicional 4/2025’ da Deputación da Coruña. Este paso abre a porta a concretar actuacións de mellora en servizos e infraestruturas municipais con apoio provincial.
O transporte foi outro dos eixos do pleno. Saíron adiante por unanimidade dúas mocións do PsdeG-PSOE centradas na modernización da liña ferroviaria, o restablecemento de frecuencias e a recuperación da parada do tren nos apeadoiros de Miño e Perbes, así como na mellora do transporte público por estrada e na recuperación de frecuencias na liña de autobús Coruña-Ferrol e Ferrol-Coruña. A maiores, tamén se aprobou por unanimidade unha moción do PP orientada á mellora do servizo ferroviario.
No apartado de propostas rexeitadas, o pleno votou en contra dunha moción do PP relativa á actualización do ‘Estatuto marco do persoal sanitario dos servizos de saúde’ desde o consenso cos profesionais e as comunidades autónomas. Tamén foi rexeitada unha moción do Grupo Mixto-BNG enfocada a garantir o mantemento das infraestruturas básicas municipais.