Miño presenta a campaña 'Merca en Miño: no comercio local gañamos todos'
O Concello de Miño, a través da Concellería de Deporte, Turismo, Promoción Económica e Xuventude, dará a coñecer mañá, xoves 5 de decembro, a súa nova campaña ‘Merca en Miño: no comercio local gañamos todos’. O acto terá lugar ás 14:00 horas no salón de plenos da Casa Consistorial.
Esta iniciativa está dirixida a negocios de alimentación, moda e complementos, servizos, coidado animal e comercio en xeral, sectores clave na economía local. O obxectivo principal é concienciar á veciñanza sobre a importancia de realizar as súas compras no comercio de proximidade, destacando o valor engadido que ofrece en calidade e atención personalizada.
O Concello busca tamén fomentar a sustentabilidade económica, social e ambiental, promovendo un consumo máis responsable que contribúa a reducir os desprazamentos e o seu impacto ambiental. Ademais, a campaña inclúe materiais promocionais como carteis, vinilos personalizados, bolsas reutilizables e outros recursos gráficos que estarán dispoñibles para os negocios adheridos.
O acto de presentación desta acción contará co reparto destes materiais e cunha chamada á participación activa da comunidade para garantir un municipio máis dinámico e atractivo.