Miño lidera a creación dun novo servizo de atención temperá para nenos e nenas de 0 a 6 anos
O Concello de Miño anunciou a posta en marcha dun servizo de atención temperá dirixido a nenos e nenas de entre 0 e 6 anos, que tamén beneficiará aos municipios de Vilarmaior e Pontedeume. Con preto de 250.000 euros de financiamento para os anos 2025 e 2026, o proxecto responde a unha demanda crecente, permitindo que as familias poidan acceder a apoio profesional sen ter que desprazarse a A Coruña, como sucedía ata agora.
O novo servizo, que estará situado na primeira planta do Centro Social de Leiro, contará cun espazo adaptado para ofrecer atención integral a través de equipos especializados en psicoloxía, logopedia e terapia ocupacional. O obxectivo principal é identificar, previr e intervir en trastornos do desenvolvemento infantil, proporcionando ás crianzas os apoios necesarios para mellorar as súas capacidades e promover a súa inclusión social.
Este servizo supón unha importante mellora para a calidade de vida dos pequenos e pequenas da comarca, ofrecendo unha atención personalizada e accesible para as familias.
Promesa electoral cumprida
Este novo proxecto forma parte dun plan de mellora integral dos servizos sociais municipais, sendo unha das promesas electorais do actual goberno. Ata o de agora, as familias de Miño, Vilarmaior e Pontedeume víanse obrigadas a desprazarse a A Coruña para recibir este tipo de atención. O proxecto eliminará estas barreiras xeográficas e ampliará a dispoñibilidade de servizos.
O proxecto será cofinanciado por fondos europeos a través do Programa FSE+ Galicia 2021-2027 e conta co apoio da Xunta de Galicia, garantindo a súa sostibilidade económica para 2025 e 2026. O servizo estará operativo dende xaneiro de 2025, con horario de luns a xoves pola mañá e pola tarde, e os venres só pola mañá.