Miño destinará máis de 158.000 euros do Plan Complementario á reforma da Praza da Fonte
A sesión plenaria celebrada este martes 6 de febreiro no Concello de Miño deu luz verde á aprobación do Plan Complementario 2024 da Deputación da Coruña, unha vía de financiamento que achegará 158.588,45 euros e que o goberno local utilizará para renovar a Praza da Fonte.
O plan do proxecto inclúe a ordenación dos usos de todo o espazo, o acondicionamento do tramo do Camiño de Santiago, a reparación da pista polideportiva e as bancadas e a renovación do pavimento.
A actuación impulsada polo goberno local busca resolver as carencias e problemas que presenta este espazo na actualidade.
Ademais, os traballos inclúen a optimización dos espazos de aparcamento (ademais da instalación de aparcabicis), a mellora dos accesos dos camiños á praza, a separación do tráfico rodado do peonil coa instalación de beirarrúas, a renovación do pavimento e a renovación integral da pista multiusos, mellorando o pavimento, os accesos e as bancadas.
Tamén se actuará no tramo do Camiño de Santiago que pasa pola praza. Desta forma, pavimentarase o trazado con materiais que respecten a tipoloxía clásica do itinerario. Colocaranse bancos para o descanso e integrarase a fonte e o seu camiño histórico de acceso. Ademais, plantaranse árbores de especies autóctonas para ofrecer espazos de sombra.
A alcaldesa de Miño en funcións, Catalina Morado, afirmaba hoxe que este proxecto "humaniza o espazo e amplía a nosa oferta de lecer". Tamén aseguraba que a renovación dá pista e dás bancadas confirma a aposta deste goberno polas infraestruturas deportivas e engadiu que a posta en valor do Camiño de Santiago reforza vos nosos atractivos turísticos e culturais.