Mera celebrará a Festa dos Reis Magos o domingo 5 de xaneiro
O domingo 5 de xaneiro, Mera acollerá a súa tradicional Festa dos Reis Magos cun completo programa de actividades para celebrar esta data tan especial. A celebración dará comezo ás 16:00 horas na Lagoa de Mera, onde os máis pequenos poderán participar nunha festa infantil con xogos populares organizados pola compañía Somos Enredos.
O momento máis esperado será o paso da cabalgata, previsto para as 18:10 horas, seguido da recepción real dos Reis Magos, onde os nenos e nenas terán a oportunidade de entregar as súas cartas persoalmente. Para completar a festa, ofrecerase unha chocolatada e realizarase o sorteo de varios Roscóns de Reis, garantindo momentos doces e especiais para todos os asistentes.
Este evento está organizado grazas á colaboración de diversas entidades locais, como a AV San Cosme de Maianca, o Marino de Mera CF, o CDM Mera, a Asociación Cultural Santa Ana, a Coral Polifónica de Mera, a Agrupación Cultural A Marola e a ACRD Festas do Mar de Mera.
O Concello de Oleiros invita a toda a veciñanza a sumarse a esta festa, que combina tradición e diversión para despedir o Nadal e recibir aos Reis Magos nun ambiente único e familiar.