Martín Pallín leva a Casa Charry a súa mirada crítica sobre a xustiza española
Casa Charry acollerá o vindeiro xoves 28 de maio, ás 19.00 horas, a presentación do novo libro do xurista galego José Antonio Martín Pallín, 'Visto para sentencia. Jueces e ideología en la Justicia española'. O acto será de acceso libre e gratuíto e permitirá achegar ao público unha reflexión sobre o papel da xustiza na España actual.
A presentación estará conducida pola xornalista Isabel Bravo e contará tamén coa participación do alcalde de Oleiros, Ángel García Seoane. Xunto ao autor, abrirán un coloquio arredor dalgúns dos grandes debates do momento: a independencia xudicial, a defensa do Estado de dereito e a relación, cada vez máis presente no debate público, entre xustiza e política.
Martín Pallín chega a Oleiros cunha longa traxectoria na maxistratura española. Nado na Coruña en 1936, foi fiscal de carreira e maxistrado emérito da Sala Segunda do Tribunal Supremo, ademais de voceiro de Jueces para la Democracia e presidente da Asociación Pro Derechos Humanos de España.
O seu novo traballo, publicado por Siglo XXI Editores, propón unha análise crítica sobre o funcionamento interno dos tribunais e sobre a influencia ideolóxica no sistema xudicial. A obra sitúa no centro cuestións como a imparcialidade, a separación de poderes e o papel dos xuíces nun contexto político e social marcado pola polarización.
A cita en Casa Charry permitirá escoitar en directo a un dos xuristas galegos con maior recoñecemento público, unha voz que ao longo da súa carreira mantivo unha posición activa na defensa dos dereitos humanos e das garantías democráticas.
Con esta presentación, Oleiros suma unha nova actividade cultural e de pensamento arredor dun tema de plena actualidade, nun formato aberto á participación do público e ao debate.