María Bazar Verdes representará a Galicia na XIII edición do Premio Promesas de Le Cordon Bleu Madrid de alta cociña
A galega María Bazar Verdes, estudante do CIFP Paseo das Pontes de A Coruña, foi seleccionada para participar na XIII edición do Premio Promesas da Alta Cociña de Le Cordon Bleu Madrid, un dos certames máis recoñecidos no ámbito gastronómico español. A coruñesa únese aos 50 estudantes escollidos entre aspirantes de 27 centros educativos de 19 provincias, para competir na seguinte fase.
O certame busca recoñecer o talento dos mellores estudantes menores de 25 anos que cursan o último ano de formación en cociña en centros de todo o país. Nesta edición, que coincide co 130 aniversario da prestixiosa institución, increméntanse os premios: o gañador obterá unha beca valorada en 40.000 euros para cursar o recoñecido Grand Diplôme®, mentres que o segundo clasificado poderá optar a unha beca de 23.000 euros para estudar un diploma nalgunha das especialidades que ofrece Le Cordon Bleu.
A participación galega nesta edición non é unha novidade. Na pasada convocatoria, o coruñés Jacobo Diz, tamén do CIFP Paseo das Pontes, destacou ao alzarse co primeiro premio. Conseguiu conquistar ao xurado, presidido polo chef Eduard Xatruch —posuidor de 3 estrelas Michelin e 3 soles Repsol—, cun prato elaborado a partir de ingredientes e técnicas comúns.
Nesta etapa, os participantes deberán gravar unha vídeo receita de 5 minutos como máximo antes do 22 de xaneiro, seguindo as bases propostas polo certame. As receitas serán avaliadas polo público, que poderá votar os seus vídeos favoritos a través de YouTube e da aplicación oficial do premio. Este voto sumarase á valoración profesional dun xurado formado por docentes da escola, quen seleccionará os 10 finalistas que competirán na gran final presencial, prevista para abril de 2025 na sede de Le Cordon Bleu Madrid.
Os finalistas deberán presentar os seus pratos diante dun xurado profesional, presidido en edicións anteriores por grandes figuras da gastronomía como Martín Berasategui, Joan Roca, Diego Guerrero ou Nacho Manzano.
O Premio Promesas da Alta Cociña é unha oportunidade única para os estudantes que buscan impulsar as súas carreiras no mundo da gastronomía. Ademais das becas para os dous primeiros clasificados, a organización tamén premiará ao centro do gañador cunha axuda de 1.500 euros, fomentando así a formación de futuros talentos no ámbito culinario.