Máis seguridade para os peóns en Tarrío con 327 metros de novas beirarrúas xunto ao colexio e o polideportivo
O entorno do CEIP Plurilingüe e do polideportivo municipal de Tarrío, en Culleredo, contará con novas medidas para mellorar a seguridade dos peóns. A Deputación da Coruña aprobou no pleno provincial unha actuación de 221.001,30 euros que permitirá construír 327 metros de novas beirarrúas accesibles na estrada provincial DP-1705, que conecta Tarrío con O Gaiteiro.
O obxectivo é crear un itinerario peonil continuo e seguro nunha zona con importante presenza de peóns, especialmente durante as horas de entrada e saída do colexio e nos momentos de maior actividade nas instalacións deportivas.
Unha beirarrúa de 1,80 metros de ancho
A nova beirarrúa construirase na marxe dereita da estrada, entre os puntos quilométricos 1+030 e 1+357. Terá 1,80 metros de ancho e permitirá conectar o colexio, o polideportivo e o campo de fútbol mediante un percorrido accesible.
Os traballos dividiranse en dous tramos. O primeiro terá 170 metros de lonxitude e discorrerá xunto ás instalacións deportivas e ás zonas de estacionamento. O segundo alcanzará os 157 metros e estará acompañado dunha ampliación parcial da calzada para mellorar a configuración da vía.
Dous pasos elevados e velocidade limitada a 30 quilómetros por hora
A seguridade viaria será un dos principais elementos da intervención. O proxecto contempla a construción de un novo paso peonil elevado e a elevación doutro xa existente.
Ambos contarán con iluminación específica e sinalización dinámica para advertir aos condutores da presenza de peóns. Ademais, renovarase a sinalización horizontal e vertical e establecerase unha limitación de velocidade de 30 quilómetros por hora no entorno escolar e deportivo.
O percorrido incorporará tamén pavimento podotáctil nos cruces e accesos, co obxectivo de facilitar o desprazamento das persoas con discapacidade visual.
Tamén se renovará a drenaxe e o alumeado
A actuación non se limitará á construción das beirarrúas. As obras incluirán a renovación do firme nas zonas afectadas, unha nova rede para recoller as augas pluviais e canalizacións destinadas ao alumeado público.
O proxecto contempla ademais o acondicionamento das zonas verdes mediante a plantación de árbores e especies arbustivas.
A Deputación prevé un prazo de execución de catro meses. O proxecto foi redactado polo Concello de Culleredo a partir das necesidades detectadas neste entorno, mentres que o organismo provincial será o encargado de executar os traballos na estrada da súa titularidade.
Primeira fase dun itinerario peonil máis longo
A actuación aprobada constitúe a primeira fase da mellora do itinerario peonil da DP-1705.
O Concello de Culleredo xa ten redactado un segundo proxecto para prolongar as beirarrúas desde o final desta intervención ata o límite co municipio de Cambre. Para poder executar este tramo será necesario completar previamente as expropiacións correspondentes.
Desde a Deputación e o Concello de Culleredo sinalan que a intervención permitirá atender unha demanda das familias e da veciñanza de Tarrío e mellorar a seguridade nun dos puntos do núcleo con maior concentración de desprazamentos peonís.