Máis de mil sinaturas levan ao Parlamento a reclamación dun mellor bus en Ordes
O BNG de Ordes trasladou ao Parlamento de Galicia a demanda veciñal para mellorar o transporte público no municipio. A formación nacionalista entregou na Cámara galega máis de 1.000 sinaturas recollidas nas últimas semanas dentro dunha campaña coa que busca presionar á Xunta para corrixir as carencias que, segundo denuncia, padecen as persoas usuarias do autobús.
A delegación ordense estivo acompañada polos deputados nacionalistas Óscar Insua e Saleta Fernández, aos que tamén lles trasladou as propostas e queixas achegadas pola veciñanza durante a recollida de apoios. O BNG agradeceu a participación cidadá e advertiu de que a entrega das sinaturas non supón o final da campaña, senón un paso máis para manter viva a reclamación institucional.
A formación leva semanas denunciando que o servizo actual non responde ás necesidades reais de mobilidade de Ordes, especialmente para quen depende do transporte público por motivos laborais, educativos, sanitarios ou administrativos. Entre as demandas trasladadas figuran a mellora das frecuencias, a adaptación dos horarios e a necesidade de garantir un servizo máis útil para a conexión coa Coruña, Santiago e outros puntos de referencia para a veciñanza.
A reclamación chega nun contexto no que o transporte metropolitano acumula críticas en distintos municipios da área coruñesa. O propio Plan de Transporte Metropolitano inclúe Ordes dentro da área da Coruña, na zona C-Ord3, e a Xunta sinala que esta rede abrangue 17 concellos, con máis de 400.000 servizos anuais e máis de 7.700 paradas.
O BNG xa levou recentemente ao Parlamento galego as queixas polo funcionamento do transporte metropolitano na comarca da Coruña. Nesa intervención, a deputada Iria Taibo puxo o foco en problemas como a falta de información actualizada, os horarios insuficientes, a saturación en horas punta e a ausencia de respostas adaptadas aos desprazamentos diarios por traballo ou estudos.
Desde Ordes, os nacionalistas sosteñen que a mobilidade pública debe ser unha prioridade para reducir a dependencia do coche privado y garantir igualdade de oportunidades tamén fóra das grandes cidades. Por iso, anuncian que seguirán reclamando ante a Xunta un servizo de autobús 'digno', con horarios e frecuencias que dean resposta ás necesidades cotiás da veciñanza.