Máis de mil prazas para un verán con campamentos, deporte e saídas en Bergondo
A oferta de actividades de verán en Bergondo chegará este ano ás 1.145 prazas, con propostas dirixidas á infancia, á mocidade, ás familias e tamén ás persoas adultas. O programa inclúe campamentos de conciliación, actividades deportivas, saídas de lecer, propostas náuticas e campus organizados por entidades deportivas do municipio.
O prazo de preinscrición abrirá o luns 18 de maio e pechará o xoves 21. As persoas interesadas poderán anotarse a través do formulario web habilitado ou de maneira presencial na Casa da Cultura, en horario de 9.30 a 14.30 horas.
Entre as propostas principais están os campamentos de conciliación, que se desenvolverán na Senra para nenos e nenas de 3 a 12 anos. O horario ordinario será de 9.00 a 14.00 horas, aínda que haberá posibilidade de ampliar a estancia de 8.00 a 15.00 horas. Quen entre ás 8.00 horas poderá acceder ao almorzo, sempre que o indique na solicitude.
A programación tamén reserva espazo para o alumnado de secundaria, con dous campamentos deportivos en xullo. O primeiro celebrarase do 1 ao 15 e o segundo do 16 ao 31. Terán lugar no edificio da Senra e na súa contorna, cun máximo de 24 prazas e un mínimo de oito participantes para poder saír adiante.
Fóra dos campamentos habituais, haberá outras propostas pensadas para diferentes idades. A rapazada de 8 a 16 anos poderá participar no Campamento de Verán 2026 en Galipark Multiaventura, en Padrón. Tamén se programa unha visita ao Aquapark de Cerceda o 22 de xullo, con 44 prazas para mozos e mozas de 5 a 17 anos. Para as familias, a actividade 'Día en familia' levará as persoas participantes ao Aventura Dakar de Sanxenxo o 11 de xullo, con 58 prazas dispoñibles.
O mar tamén terá protagonismo durante o verán. Todos os martes e xoves de xullo e agosto, de 10.00 a 13.00 horas, realizaranse actividades náuticas na praia de Gandarío. Haberá dous turnos e cada un contará cun máximo de 30 prazas.
A programación complétase con actividades deportivas para persoas adultas durante os meses de xullo e setembro. Haberá talleres de ioga, taichí, pilates e zumba no ximnasio ou na pista polideportiva da Casa da Cultura. Ademais, para maiores de 55 anos ofrecerase unha actividade centrada na prevención de danos músculo-esqueléticos.
Á oferta xeral súmanse os campus impulsados por entidades deportivas locais. O Club Atlético Bergondo, o Club Rítmica AUSARTA e o Club de Remo Olímpico do Mandeo tamén desenvolverán actividades para nenos, nenas e adolescentes durante o período estival.