Máis de medio millón de euros para renovar a estrada entre San Vicente de Vigo e Oza dos Ríos
A Deputación da Coruña aprobou no pleno provincial un investimento de 531.849,06 euros para mellorar a estrada DP 0106, que une San Vicente de Vigo con Oza dos Ríos, ao seu paso polo municipio de Oza Cesuras. A actuación desenvolverase entre os puntos quilométricos 3+230 e 8+200 e ten como obxectivo reforzar a seguridade viaria nun tramo que presenta deterioracións no firme e necesidades de conservación.
Os traballos centraranse nunha intervención integral sobre a capa de rodaxe. O proxecto inclúe a limpeza e apertura de cunetas nas dúas marxes, o desbroce de taludes e a retirada da vexetación que poida afectar á visibilidade ou á seguridade da circulación.
A obra contempla tamén o fresado en accesos, entronques e zonas deterioradas, así como a regularización puntual do firme nos puntos nos que existen afundimentos. Posteriormente, estenderase unha nova capa de mestura bituminosa en quente de 5 centímetros de espesor ao longo de todo o tramo afectado.
A intervención completarase coa adaptación de elementos como tapas de rexistro á nova rasante da estrada e coa renovación da sinalización horizontal. Con estas melloras, a Deputación busca recuperar unhas condicións de circulación máis seguras e cómodas para os usuarios desta vía provincial.
O presidente da Deputación da Coruña, Valentín González Formoso, destacou que a institución continúa avanzando nun plan de mellora da rede viaria provincial, priorizando a seguridade e a adecuación das estradas ás necesidades actuais. No caso de Oza Cesuras, a actuación permitirá reforzar unha conexión local importante e mellorar a funcionalidade dunha estrada de uso habitual para a veciñanza.